This page in Tamil   Hindi/Sanskrit   Telugu   Malayalam   Bengali   Kannada   English   ITRANS    Marati  Gujarathi   Oriya   Singala   Tibetian   Thai   Japanese   Urdu   Cyrillic/Russian  

2.076   திருஞானசம்பந்த சுவாமிகள்   திருக்கடைக்காப்பு திருஅகத்தியான்பள்ளி - காந்தாரம் அருள்தரு மங்கைநாயகியம்மை உடனுறை அருள்மிகு அகத்தீசுவரர் திருவடிகள் போற்றி

Audio: https://www.youtube.com/watch?v=eQLOfeO_N6k  

வாடிய வெண்தலை மாலை சூடி, வயங்கு இருள நீடு உயர் கொள்ளி விளக்கும் ஆக, நிவந்து எரி ஆடிய எம்பெருமான் அகத்தியான் பள்ளியைப் பாடிய சிந்தையினார்கட்கு இல்லை ஆம், பாவமே.	[ 1]
துன்னம் கொண்ட உடையான், துதைந்த வெண் நீற்றினான், மன்னும் கொன்றை மதமத்தம் சூடினான், மா நகர் அன்னம் தங்கும் பொழில் சூழ் அகத்தியான் பள்ளியை உன்னம் செய்த மனத்தார்கள் தம் வினை ஓடுமே.	[ 2]
உடுத்ததுவும் புலித்தோல்; பலி, திரிந்து உண்பதும்; கடுத்து வந்த கழல் காலன் தன்னையும், காலினால் அடர்த்ததுவும்; பொழில் சூழ் அகத்தியான் பள்ளியான் தொடுத்ததுவும் சரம், முப்புரம் துகள் ஆகவே.	[ 3]
காய்ந்ததுவும் அன்று காமனை, நெற்றிக்கண்ணினால்; பாய்ந்ததுவும் கழல் காலனை; பண்ணின், நால்மறை, ஆய்ந்ததுவும்; பொழில் சூழ் அகத்தியான் பள்ளியான் ஏய்ந்ததுவும் இமவான் மகள் ஒரு பாகமே.	[ 4]
போர்த்ததுவும் கரியின்(ன்) உரி; புலித்தோல், உடை; கூர்த்தது ஓர் வெண்மழு ஏந்தி; கோள் அரவம், அரைக்கு ஆர்த்ததுவும்; பொழில் சூழ் அகத்தியான் பள்ளியான் பார்த்ததுவும்(ம்) அரணம், படர் எரி மூழ்கவே.	[ 5]
Go to top
தெரிந்ததுவும், கணை ஒன்று; முப்புரம், சென்று உடன் எரிந்ததுவும்; முன் எழில் ஆர் மலர் உறைவான் தலை, அரிந்ததுவும்; பொழில் சூழ் அகத்தியான்பள்ளியான் புரிந்ததுவும்(ம்) உமையாள் ஓர்பாகம் புனைதலே.	[ 6]
ஓதி, எல்லாம்! உலகுக்கு ஒர் ஒண் பொருள் ஆகி! மெய்ச் சோதி! என்று தொழுவார் அவர் துயர் தீர்த்திடும் ஆதி, எங்கள் பெருமான், அகத்தியான் பள்ளியை நீதியால் தொழுவார் அவர் வினை நீங்குமே.	[ 7]
செறுத்ததுவும் தக்கன் வேள்வியை; திருந்தார் புரம், ஒறுத்ததுவும்; ஒளி மா மலர் உறைவான் சிரம், அறுத்ததுவும்; பொழில் சூழ் அகத்தியான் பள்ளியான் இறுத்ததுவும் அரக்கன் தன் தோள்கள் இருபதே.	[ 8]
சிரமும், நல்ல மதமத்தமும், திகழ் கொன்றையும், அரவும், மல்கும் சடையான் அகத்தியான் பள்ளியைப் பிரமனோடு திருமாலும் தேடிய பெற்றிமை பரவ வல்லார் அவர் தங்கள் மேல் வினை பாறுமே.	[ 9]
செந்துவர் ஆடையினாரும், வெற்று அரையே திரி புந்தி இலார்களும், பேசும் பேச்சு அவை பொய்ம்மொழி; அந்தணன், எங்கள் பிரான், அகத்தியான் பள்ளியைச் சிந்திமின்! நும் வினை ஆனவை சிதைந்து ஓடுமே.	[ 10]
Go to top
ஞாலம் மல்கும் தமிழ் ஞானசம்பந்தன், மா மயில் ஆலும் சோலை புடை சூழ் அகத்தியான் பள் சூலம் நல்ல படையான் அடி தொழுது ஏத்திய மாலை வல்லார் அவர் தங்கள் மேல் வினை மாயுமே.	[ 11]

Thevaaram Link  - Shaivam Link
Other song(s) from this location: திருஅகத்தியான்பள்ளி

2.076   திருஞானசம்பந்த சுவாமிகள்   திருக்கடைக்காப்பு   வாடிய வெண்தலை மாலை சூடி, Tune - காந்தாரம்   (திருஅகத்தியான்பள்ளி அகத்தீசுவரர் மங்கைநாயகியம்மை)

This page was last modified on Sun, 31 Mar 2024 02:36:43 -0400
          send corrections and suggestions to admin @ sivaya.org

thirumurai song