This page in Tamil   Hindi/Sanskrit   Telugu   Malayalam   Bengali   Kannada   English   ITRANS    Marati  Gujarathi   Oriya   Singala   Tibetian   Thai   Japanese   Urdu   Cyrillic/Russian  

3.066   திருஞானசம்பந்த சுவாமிகள்   திருக்கடைக்காப்பு திருவேட்டக்குடி - பஞ்சமம் அருள்தரு சாந்தநாயகியம்மை உடனுறை அருள்மிகு திருமேனியழகீசுவரர் திருவடிகள் போற்றி

Audio: https://www.youtube.com/watch?v=0sVAFKKhnjM  

வண்டு இரைக்கும் மலர்க்கொன்றை விரி சடைமேல் வரி அரவம் கண்டு இரைக்கும் பிறைச் சென்னிக் காபாலி கனை கழல்கள் தொண்டு இரைத்துத் தொழுது இறைஞ்ச, துளங்கு ஒளி நீர்ச் சுடர்ப் பவளம் தெண்திரை(க்)கள் கொணர்ந்து எறியும் திரு வேட்டக் குடியாரே.	[ 1]
பாய் திமிலர் வலையோடு மீன் வாரிப் பயின்று எங்கும் காசினியில் கொணர்ந்து அட்டும் கைதல் சூழ் கழிக் கானல் போய் இரவில் பேயோடும் புறங்காட்டில் புரிந்து, அழகு ஆர் தீ-எரி கை மகிழ்ந்தாரும் திரு வேட்டக்குடியாரே.	[ 2]
தோத்திரமா மணல் இலிங்கம் தொடங்கிய ஆன் நிரையின் பால் பாத்திரமா ஆட்டுதலும், பரஞ்சோதி பரிந்து அருளி ஆத்தம் என மறை நால்வர்க்கு அறம் புரி நூல் அன்று உரைத்த, தீர்த்தம் மல்கு சடையாரும் திரு வேட்டக்குடியாரே.	[ 3]
கலவம் சேர் கழிக் கானல் கதிர் முத்தம் கலந்து எங்கும் அலவன் சேர் அணை வாரிக் கொணர்ந்து எறியும் அகன் துறைவாய் நிலவு அம் சேர் நுண் இடைய நேரிழையாள் அவளோடும் திலகம் சேர் நெற்றியினார் திரு வேட்டக்குடியாரே.	[ 4]
பங்கம் ஆர் கடல் அலற, பருவரையோடு அரவு உழல, செங்கண் மால் கடைய, எழு நஞ்சு அருந்தும் சிவமூர்த்தி; அங்கம் நால்மறை நால்வர்க்கு அறம் பொருளின் பயன் அளித்த திங்கள் சேர் சடையாரும் திரு வேட்டக்குடியாரே.	[ 5]
Go to top
நாவாய பிறைச் சென்னி, நலம் திகழும் இலங்கு இப்பி, கோவாத நித்திலங்கள், கொணர்ந்து எறியும் குளிர்கானல் ஏ ஆரும் வெஞ்சிலையால் எயில் மூன்றும் எரிசெய்த தேவாதி தேவனார் திரு வேட்டக்குடியாரே.	[ 6]
பால் நிலவும் பங்கயத்துப் பைங்கானல் வெண்கு கான் நிலவு மலர்ப் பொய்கைக் கைதல் சூழ் கழிக் கானல் மானின் விழி மலைமகளோடு ஒரு பாகம் பிரிவு அரியார் தேன் நிலவு மலர்ச்சோலைத் திரு வேட்டக்குடியாரே.	[ 7]
துறை உலவு கடல் ஓதம் சுரிசங்கம் இடறிப் போய், நறை உலவும் பொழில் புன்னை நன்நீழல் கீழ் அமரும் இறை பயிலும் இராவணன் தன் தலை பத்தும் இருபது தோள திறல் அழிய அடர்த்தாரும் திரு வேட்டக்குடியாரே.	[ 8]
அருமறை நான் முகத்தானும், அகலிடம் நீர் ஏற்றானும், இருவரும் ஆய் அளப்பு அரிய எரி உரு ஆய் நீண்ட பிரான்; வருபுனலின் மணி உந்தி மறிதிரை ஆர் சுடர்ப் பவளத்- திரு உருவில் வெண் நீற்றார் திரு வேட்டக்குடியாரே.	[ 9]
இகழ்ந்து உரைக்கும் சமணர்களும், இடும் போர்வைச் சாக்கியரும், புகழ்ந்து உரையாப் பாவிகள் சொல் கொள்ளேன்மின், பொருள் என்ன! நிகழ்ந்து இலங்கு வெண்மணலின் நிறைத் துண்டப் பிறைக்கற்றை திகழ்ந்து இலங்கு செஞ்சடையார் திரு வேட்டக்குடியாரே.	[ 10]
Go to top
தெண்திரை சேர் வயல் உடுத்த திரு வேட்டக்குடியாரை, தண்டலை சூழ் கலிக் காழித் தமிழ் ஞானசம்பந்தன் ஒண் தமிழ் நூல் இவை பத்தும் உணர்ந்து ஏத்த வல்லார், போய், உண்டு உடுப்பு இல் வானவரோடு, உயர்வானத்து இருப்பாரே.	[ 11]

Thevaaram Link  - Shaivam Link
Other song(s) from this location: திருவேட்டக்குடி

3.066   திருஞானசம்பந்த சுவாமிகள்   திருக்கடைக்காப்பு   வண்டு இரைக்கும் மலர்க்கொன்றை விரி Tune - பஞ்சமம்   (திருவேட்டக்குடி திருமேனியழகீசுவரர் சாந்தநாயகியம்மை)

This page was last modified on Sun, 31 Mar 2024 02:36:43 -0400
          send corrections and suggestions to admin @ sivaya.org

thirumurai song