This page in Tamil   Hindi/Sanskrit   Telugu   Malayalam   Bengali   Kannada   English   ITRANS    Marati  Gujarathi   Oriya   Singala   Tibetian   Thai   Japanese   Urdu   Cyrillic/Russian  

5.061   திருநாவுக்கரசர்   தேவாரம் திருஅரிசிற்கரைப்புத்தூர் - திருக்குறுந்தொகை அருள்தரு அழகம்மை உடனுறை அருள்மிகு படிக்காசளித்தவீசுவரர் திருவடிகள் போற்றி

Audio: https://www.youtube.com/watch?v=vZRglV02Emc  

முத்து ஊரும் புனல் மொய் அரிசிற்கரைப் புத்தூரன்(ன்) அடி போற்றி! என்பார் எலாம் மொய்த்து ஊரும் புலன் ஐந்தொடு புல்கிய மைத்து ஊரும் வினை மாற்றவும் வல்லரே.	[ 1]
பிறைக்கணிச் சடை எம்பெருமான் என்று- கறைக் கணித்தவர் கண்ட வணக்கத்து ஆய் உறக் கணித்து-உருகா மனத்தார்களைப் புறக்கணித்திடும், புத்தூர்ப் புனிதனே.	[ 2]
அரிசிலின் கரைமேல், அணி ஆர்தரு புரிசை, நம் திருப் புத்தூர்ப் புனிதனைப் பரிசொடும் பரவிப் பணிவார்க்கு எலாம் துரிசு இல் நன்நெறி தோன்றிடும்; காண்மினே!	[ 3]
வேதனை(ம்), மிகு வீணையில் மேவிய கீதனை, கிளரும் நறுங்கொன்றை அம்- போதனை, புனல் சூழ்ந்த புத்தூரனை, நாதனை(ந்), நினைந்து என் மனம் நையுமே.	[ 4]
அருப்புப் போல் முலையார் அல்லல் வாழ்க்கை மேல் விருப்புச் சேர் நிலை விட்டு, நல் இட்டம் ஆய், திருப் புத்தூரனைச் சிந்தைசெயச் செய, கருப்புச் சாற்றிலும் அண்ணிக்கும்; காண்மினே!	[ 5]
Go to top
பாம்பொடு(ம்) மதியும் படர் புன் சடைப் பூம்புனலும் பொதிந்த புத்தூர் உளான், நாம் பணிந்து அடி போற்றிட, நாள்தொறும் சாம்பல் என்பு தனக்கு அணி ஆகுமே.	[ 6]
கனல் அங்கைதனில் ஏந்தி, வெங்காட்டு இடை அனல் அங்கு எய்தி, நின்று, ஆடுவர்; பாடுவர்; பினல் அம் செஞ்சடைமேல் பிலயம் தரு புனலும் சூடுவர் போலும்-புத்தூரரே.	[ 7]
காற்றிலும் கடிது ஆகி நடப்பது ஓர் ஏற்றினும்(ம்) இசைந்து ஏறுவர்; என்பொடு நீற்றினை அணிவர்; நினைவுஆய்த் தமை, போற்றி! என்பவர்க்கு அன்பர்-புத்தூரரே.	[ 8]
முன்னும் முப்புரம் செற்றனர் ஆயினும் அன்னம் ஒப்பர், அலந்து அடைந்தார்க்கு எலாம்; மின்னும் ஒப்பர், விரிசடை; மேனி செம்- பொன்னும் ஒப்பர்-புத்தூர் எம் புனிதரே.	[ 9]
செருத்தனால்-தன தேர் செல உய்த்திடும் கருத்தனாய்க் கயிலை எடுத்தான் உடல், பருத்த தோள் கெடப் பாதத்து ஒருவிரல் பொருத்தினார்-பொழில் ஆர்ந்த புத்தூரரே.	[ 10]
Go to top

Thevaaram Link  - Shaivam Link
Other song(s) from this location: திருஅரிசிற்கரைப்புத்தூர்

2.063   திருஞானசம்பந்த சுவாமிகள்   திருக்கடைக்காப்பு   மின்னும் சடைமேல் இளவெண் திங்கள் Tune - காந்தாரம்   (திருஅரிசிற்கரைப்புத்தூர் படிக்காசளித்தவீசுவரர் அழகம்மை)

5.061   திருநாவுக்கரசர்   தேவாரம்   முத்து ஊரும் புனல் மொய் Tune - திருக்குறுந்தொகை   (திருஅரிசிற்கரைப்புத்தூர் படிக்காசளித்தவீசுவரர் அழகம்மை)

7.009   சுந்தரமூர்த்தி சுவாமிகள்   திருப்பாட்டு   மலைக்கும்(ம்) மகள் அஞ்ச(ம்) மதகரியை Tune - இந்தளம்   (திருஅரிசிற்கரைப்புத்தூர் படிக்காசுவைத்தவீசுவரர் அழகம்மை)

This page was last modified on Sun, 31 Mar 2024 02:36:43 -0400
          send corrections and suggestions to admin @ sivaya.org

thirumurai song