This page in Tamil   Hindi/Sanskrit   Telugu   Malayalam   Bengali   Kannada   English   ITRANS    Marati  Gujarathi   Oriya   Singala   Tibetian   Thai   Japanese   Urdu   Cyrillic/Russian  

2.067   திருஞானசம்பந்த சுவாமிகள்   திருக்கடைக்காப்பு திருப்பெரும்புலியூர் - காந்தாரம் அருள்தரு சவுந்தராம்பிகையம்மை உடனுறை அருள்மிகு வியாக்கிரபுரீசுவரர் திருவடிகள் போற்றி

Audio: https://www.youtube.com/watch?v=U_cokwRyphU  

மண்ணும் ஓர் பாகம் உடையார்; மாலும் ஓர்பாகம் உடையார்; விண்ணும் ஓர் பாகம் உடையார்; வேதம் உடைய விமலர்; கண்ணும் ஓர் பாகம் உடையார்; கங்கை சடையில் கரந்தார்; பெண்ணும் ஓர்பாகம் உடையார் பெரும்புலியூர் பிரியாரே.	[ 1]
துன்னு கடல் பவளம் சேர் தூயன நீண்ட திண்தோள்கள் மின்னு சுடர்க்கொடி போலும் மேனியினார்; ஒரு கங்கைக் கன்னிகளின் புனையோடு கலைமதிமாலை கலந்த பின்னுசடைப் பெருமானார் பெரும்புலியூர் பிரியாரே.	[ 2]
கள்ளம் மதித்த கபாலம் கைதனிலே மிக ஏந்தி, துள்ள மிதித்து நின்று ஆடும் தொழிலர்; எழில் மிகு செல்வர்; வெள்ளம், நகுதலைமாலை, விரிசடை மேல் மிளிர்கின்ற பிள்ளை மதிப் பெருமானார் பெரும் புலியூர் பிரியாரே.	[ 3]
ஆடல் இலையம் உடையார்; அருமறை தாங்கி ஆறு அங்கம் பாடல் இலையம் உடையார்; பன்மை ஒருமை செய்து, அஞ்சும் ஊடு அலில் ஐயம் உடையார்; யோகு எனும் பேர் ஒளி தாங்கி, பீடு அல் இலையம் உடையார் பெரும்புலியூர் பிரியாரே.	[ 4]
தோடு உடையார், குழைக் காதில்; சூடுபொடியார்; அனல் ஆடக் காடு உடையார்; எரி வீசும் கை உடையார்; கடல் சூழ்ந்த நாடு உடையார்; பொருள் இன்பம் நல்லவை நாளும் நயந்த பீடு உடையார்; பெருமானார் பெரும்புலியூர் பிரியாரே.	[ 5]
Go to top
கற்றது உறப் பணி செய்து காண்டும் என்பார் அவர்தம் கண்; முற்று இது அறிதும் என்பார்கள் முதலியர்; வேதபுராணர்; மற்று இது அறிதும் என்பார்கள் மனத்து இடையார்; பணி செய்ய, பெற்றி பெரிதும் உகப்பார் பெரும்புலியூர் பிரியாரே.	[ 6]
மறை உடையார், ஒலிபாடல்; மா மலர்ச்சேவடி சேர்வார், குறை உடையார், குறை தீர்ப்பார்; குழகர், அழகர்; நம் செல்வர்; கறை உடையார், திகழ் கண்டம்; கங்கை சடையில் கரந்தார்; பிறை உடையார், சென்னிதன்மேல்; பெரும் புலியூர் பிரியாரே.	[ 7]
உறவியும் இன்பு உறு சீரும் ஓங்குதல், வீடு எளிது ஆகி, துறவியும் கூட்டமும் காட்டி, துன்பமும் இன்பமும் தோற்றி, மறவி அம்சிந்தனை மாற்றி, வாழ வல்லார்தமக்கு என்றும் பிறவி அறுக்கும் பிரானார் பெரும்புலியூர் பிரியாரே.	[ 8]
சீர் உடையார்; அடியார்கள் சேடர்; ஒப்பார்; சடை சேரும் நீர் உடையார்; பொடிப் பூசும் நினைப்பு உடையார்; விரிகொன்றைத் தார் உடையார்; விடை ஊர்வார்; தலைவர்; ஐந் நூற்றுப் பத்து ஆய பேர் உடையார்; பெருமானார் பெரும்புலியூர் பிரியாரே.	[ 9]
உரிமை உடைய அடியார்கள் உள் உற உள்க வல்லார்கட்கு அருமை உடையன காட்டி, அருள் செயும் ஆதிமுதல்வர்; கருமை உடை நெடுமாலும், கடிமலர் அண்ணலும், காணாப் பெருமை உடைப் பெருமானார் பெரும்புலியூர் பிரியாரே.	[ 10]
Go to top
பிறை வளரும் முடிச் சென்னிப் பெரும்புலியூர்ப் பெருமானை, நறை வளரும் பொழில் காழி நல் தமிழ் ஞானசம்பந்தன், மறை வளரும் தமிழ்மாலை வல்லவர், தம் துயர் நீங்கி, நிறை வளர் நெஞ்சினர் ஆகி, நீடு உலகத்து இருப்பாரே.	[ 11]

Thevaaram Link  - Shaivam Link
Other song(s) from this location: திருப்பெரும்புலியூர்

2.067   திருஞானசம்பந்த சுவாமிகள்   திருக்கடைக்காப்பு   மண்ணும் ஓர் பாகம் உடையார்; Tune - காந்தாரம்   (திருப்பெரும்புலியூர் வியாக்கிரபுரீசுவரர் சவுந்தராம்பிகையம்மை)

This page was last modified on Sun, 31 Mar 2024 02:36:43 -0400
          send corrections and suggestions to admin @ sivaya.org

thirumurai song