This page in Tamil   Hindi/Sanskrit   Telugu   Malayalam   Bengali   Kannada   English   ITRANS    Marati  Gujarathi   Oriya   Singala   Tibetian   Thai   Japanese   Urdu   Cyrillic/Russian   Hebrew   Korean  
Easy version Classic version

2.103   திருஞானசம்பந்த சுவாமிகள்   திருக்கடைக்காப்பு திருஅம்பர்மாகாளம் - நட்டராகம் நடபைரவி பந்துவாராளி கனகவசந்தம் ராகத்தில் திருமுறை அருள்தரு பட்சநாயகியம்மை உடனுறை அருள்மிகு காளகண்டேசுவரர் திருவடிகள் போற்றி

https://www.youtube.com/watch?v=v_lDttoXUC4   Add audio link

புல்கு பொன்னிறம் புரிசடை நெடுமுடிப் போழிள மதிசூடிப் பில்கு தேனுடை நறுமலர்க் கொன்றையும் பிணையல்செய் தவர்மேய மல்கு தண்டுறை யரிசிலின் வடகரை வருபுனன் மாகாளம் அல்லு நண்பக லுந்தொழு மடியவர்க் கருவினை யடையாவே.	1
அரவ மாட்டுவ ரந்துகில் புலியதள் அங்கையி லனலேந்தி இரவு மாடுவ ரிவையிவர் சரிதைகள் இசைவன பலபூதம் மரவந்தோய்பொழி லரிசிலின் வடகரை வருபுனன் மாகாளம் பரவி யும்பணிந் தேத்தவல் லாரவர் பயன்றலைப் படுவாரே.	2
குணங்கள் கூறியுங் குற்றங்கள் பரவியுங் குரைகழ லடிசேரக் கணங்கள் பாடவுங் கண்டவர் பரவவுங் கருத்தறிந் தவர்மேய மணங்கொள் பூம்பொழி லரிசிலின் வடகரை வருபுனன் மாகாளம் வணங்கு முள்ளமோ டணையவல் லார்களை வல்வினை யடையாவே.	3
எங்கு மேதுமோர் பிணியிலர் கேடிலர் இழைவளர் நறுங்கொன்றை தங்கு தொங்கலுந் தாமமுங் கண்ணியுந் தாமகிழ்ந் தவர்மேய மங்குல் தோய்பொழி லரிசிலின் வடகரை வருபுனன் மாகாளம் கங்கு லும்பக லுந்தொழு மடியவர் காதன்மை யுடையாரே.	4
நெதிய மென்னுள போகமற் றென்னுள நிலமிசை நலமாய கதிய மென்னுள வானவ ரென்னுளர் கருதிய பொருள்கூடில் மதியந் தோய்பொழி லரிசிலின் வடகரை வருபுனன் மாகாளம் புதிய பூவொடு சாந்தமும் புகையுங்கொண் டேத்துதல் புரிந்தோர்க்கே.	5
Go to top
கண்ணு லாவிய கதிரொளி முடிமிசைக் கனல்விடு சுடர்நாகம் தெண்ணி லாவொடு திலதமு நகுதலை திகழவைத் தவர்மேய மண்ணு லாம்பொழி லரிசிலின் வடகரை வருபுனன் மாகாளம் உண்ணி லாநினைப் புடையவ ரியாவரிவ் வுலகினி லுயர்வாரே.	6
தூசு தானரைத் தோலுடைக் கண்ணியஞ் சுடர்விடு நறுங்கொன்றை பூசு வெண்பொடிப் பூசுவ தன்றியும் புகழ்புரிந் தவர்மேய மாசு லாம்பொழி லரிசிலின் வடகரை வருபுனன் மாகாளம் பேசு நீர்மையரி யாவரிவ் வுலகினிற் பெருமையைப் பெறுவாரே.	7
பவ்வ மார்கட லிலங்கையர் கோன்றனைப் பருவரைக் கீழூன்றி எவ்வந் தீரவன் றிமையவர்க் கருள்செய்த விறையவ னுறைகோயில் மவ்வந் தோய்பொழி லரிசிலின் வடகரை வருபுனன் மாகாளம் கவ்வை யாற்றொழு மடியவர் மேல்வினை கனலிடைச் செதிளன்றே.	8
உய்யுங் காரண முண்டென்று கருதுமி னொளிகிளர் மலரோனும் பைகொள் பாம்பணைப் பள்ளிகொ ளண்ணலும் பரவநின் றவர்மேய மையுலாம்பொழி லரிசின் வடகரை வருபுனன் மாகாளம் கையி னாற்றொழு தவலமும் பிணியுந்தங் கவலையுங் களைவாரே.	9
பிண்டி பாலரு மண்டைகொ டேரரும் பீலிகொண் டுழல்வாரும் கண்ட நூலருங் கடுந்தொழி லாளாருங் கழறநின் றவர்மேய வண்டு லாம்பொழி லரிசிலின் வடகரை வருபுனன் மாகாளம் பண்டு நாஞ்செய்த பாவங்கள் பற்றறப் பரவுதல் செய்வோமே.	10
Go to top
மாறு தன்னொடு மண்மிசை யில்லது வருபுனன் மாகாளத் தீறு மாதியு மாகிய சோதியை யேறமர் பெருமானை நாறு பூம்பொழிற் காழியுண் ஞானசம் பந்தன தமிழ்மாலை கூறு வாரையுங் கேட்கவல் லாரையுங் குற்றங்கள் குறுகாவே.	11

Thevaaram Link  - Shaivam Link
Other song(s) from this location: திருஅம்பர்மாகாளம்

1.083   திருஞானசம்பந்த சுவாமிகள்   திருக்கடைக்காப்பு   அடையார் புரம் மூன்றும் அனல்வாய் Tune - குறிஞ்சி   (திருஅம்பர்மாகாளம் காளகண்டேசுவரர் பட்சநாயகியம்மை)

2.103   திருஞானசம்பந்த சுவாமிகள்   திருக்கடைக்காப்பு   புல்கு பொன் நிறம் புரி Tune - நட்டராகம்   (திருஅம்பர்மாகாளம் காளகண்டேசுவரர் பட்சநாயகியம்மை)

3.093   திருஞானசம்பந்த சுவாமிகள்   திருக்கடைக்காப்பு   படியுள் ஆர் விடையினர், பாய் Tune - சாதாரி   (திருஅம்பர்மாகாளம் காளகண்டேசுவரர் பட்சநாயகியம்மை)

This page was last modified on Sun, 09 Mar 2025 21:48:18 +0000
          send corrections and suggestions to admin-at-sivaya.org

thirumurai song paadal paadal orig pathigam no 2.103