This page in Tamil   Hindi/Sanskrit   Telugu   Malayalam   Bengali   Kannada   English   ITRANS    Marati  Gujarathi   Oriya   Singala   Tibetian   Thai   Japanese   Urdu   Cyrillic/Russian   Hebrew   Korean  
Easy version Classic version

3.026   திருஞானசம்பந்த சுவாமிகள்   திருக்கடைக்காப்பு திருக்கானப்பேர் (திருக்காளையார்கோயில்) - கொல்லி கனகாங்கி நவரோசு கனகாம்பரி ராகத்தில் திருமுறை அருள்தரு மகமாயியம்மை உடனுறை அருள்மிகு காளையீசுவரர் திருவடிகள் போற்றி

https://www.youtube.com/watch?v=D7O7s5znQTg   Add audio link

பிடியெலாம் பின்செலப் பெருங்கைமா மலர்தழீஇ விடியலே தடமூழ்கி விதியினால் வழிபடும் கடியுலாம் பூம்பொழிற் கானப்பேர் அண்ணல்நின் அடியலால் அடைசரண் உடையரோ வடியரே.	1
நுண்ணிடைப் பேரல்குல் நூபுர மெல்லடிப் பெண்ணின்நல் லாளையோர் பாகமாப் பேணினான் கண்ணுடை நெற்றியான் கருதிய கானப்பேர் விண்ணிடை வேட்கையார் விரும்புதல் கருமமே.	2
வாவிவாய்த் தங்கிய நுண்சிறை வண்டினம் காவிவாய்ப் பண்செயுங் கானப்பேர் அண்ணலை நாவிவாய்ச் சாந்துளும் பூவுளு ஞானநீர் தூவிவாய்ப் பெய்துநின் றாட்டுவார் தொண்டரே.	3
நிறையுடை நெஞ்சுளும் நீருளும் பூவுளும் பறையுடை முழவுளும் பலியுளும் பாட்டுளும் கறையுடை மிடற்றண்ணல் கருதிய கானப்பேர் குறையுடை அவர்க்கலாற் களைகிலார் குற்றமே.	4
ஏனப்பூண் மார்பின்மேல் என்புபூண் டீறிலா ஞானப்பே ராயிரம் பேரினா னண்ணிய கானப்பேர் ஊர்தொழுங் காதலார் தீதிலர் வானப்பேர் ஊர்புகும் வண்ணமும் வல்லரே.	5
Go to top
பள்ளமே படர்சடைப் பாற்படப் பாய்ந்தநீர் வெள்ளமே தாங்கினான் வெண்மதி சூடினான் கள்ளமே செய்கிலார் கருதிய கானப்பேர் உள்ளமே கோயிலா உள்கும்என் உள்ளமே.	6
மானமா மடப்பிடி வன்கையால் அலகிடக் கானமார் கடகரி வழிபடுங் கானப்பேர் ஊனமாம் உடம்பினில் உறுபிணி கெடஎண்ணில் ஞானமா மலர்கொடு நணுகுதல் நன்மையே.	7
வாளினான் வேலினான் மால்வரை யெடுத்ததிண் தோளினான் நெடுமுடி தொலையவே ஊன்றிய தாளினான் கானப்பேர் தலையினால் வணங்குவார் நாளுநாள் உயர்வதோர் நன்மையைப் பெறுவரே.	8
சிலையினான் முப்புரந் தீயெழச் செற்றவன் நிலையிலா இருவரை நிலைமைகண்டு ஓங்கினான் கலையினார் புறவிற்றேன் கமழ்தரு கானப்பேர் தலையினால் வணங்குவார் தவமுடை யார்களே.	9
உறித்தலைச் சுரையொடு குண்டிகை பிடித்துச்சி பறித்தலும் போர்த்தலும் பயனிலை பாவிகாள் மறித்தலை மடப்பிடி வளர்இளங் கொழுங்கொடி கறித்தெழு கானப்பேர் கைதொழல் கருமமே.	10
Go to top
காட்டகத்து ஆடலான் கருதிய கானப்பேர் கோட்டகத் திளவரால் குதிகொளும் காழியான் நாட்டகத் தோங்குசீர் ஞானசம் பந்தன பாட்டகத் திவைவலார்க்கு இல்லையாம் பாவமே.	11

Thevaaram Link  - Shaivam Link
Other song(s) from this location: திருக்கானப்பேர் (திருக்காளையார்கோயில்)

3.026   திருஞானசம்பந்த சுவாமிகள்   திருக்கடைக்காப்பு   பிடி எலாம் பின் செல, Tune - கொல்லி   (திருக்கானப்பேர் (திருக்காளையார்கோயில்) காளையீசுவரர் மகமாயியம்மை)

7.084   சுந்தரமூர்த்தி சுவாமிகள்   திருப்பாட்டு   தொண்டர் அடித்தொழலும், சோதி இளம்பிறையும், Tune - புறநீர்மை   (திருக்கானப்பேர் (திருக்காளையார்கோயில்) காளைநாதேசுவரர் பொற்கொடியம்மை)

This page was last modified on Sun, 09 Mar 2025 21:48:18 +0000
          send corrections and suggestions to admin-at-sivaya.org

thirumurai song paadal paadal orig pathigam no 3.026