This page in Tamil   Hindi/Sanskrit   Telugu   Malayalam   Bengali   Kannada   English   ITRANS    Marati  Gujarathi   Oriya   Singala   Tibetian   Thai   Japanese   Urdu   Cyrillic/Russian   Hebrew   Korean  
Easy version Classic version

10.733   திருமூலர்   திருமந்திரம்

Add audio link

குட்டம் ஒருமுழம் உள்ளது அரைமுழம் வட்டம் அமைந்ததோர் வாவியுள் வாழ்வன பட்டன மீன்கள் பரதன் வலைகொணர்ந்து இட்டனன் யாம்இனி ஏதம் இலோமே.	1
கிடக்கும் உடலில் கிளர்இந் திரியம் அடக்க லுறுமவன் றானே அமரன் விடக்கிரண் டின்புற மேவுறு சிந்தை நடக்கில் நடக்கும் நடக்கு மளவே.	2
அஞ்சும் அடக்கடக் கென்பர் அறிவிலார் அஞ்சும் அடக்கும் அமரரும் அங்கில்லை அஞ்சும் அடக்கில் அசேதன மாம்என்றிட்டு அஞ்சும் அடக்கா அறிவறிந் தேனே.	3
முழக்கி எழுவன மும்மத வேழம் அடக்க அறிவென்னும் தோட்டியை வைத்தேன் பிழைத்தன ஓடிப் பெருங்கேடு மண்டிக் கொழுத்தன வேழம் குலைக்கின்ற வாறே.	4
ஐந்தில் ஒடுங்கில் அகலிட மாவது ஐந்தில் ஒடுங்கில் அருந்தவ மாவது ஐந்தில் ஒடுங்கில் அரன்பத மாவது ஐந்தில் ஒடுங்கில் அருளுடை யாரே.	5
Go to top
பெருக்கப் பிதற்றிலென் பேய்த்தேர் நினைந்தென் விரித்த பொருட்கெல்லாம் வித்தாவ துள்ளம் பெருக்கிற் பெருக்கும் சுருக்கிற் சுருக்கும் அருத்தமும் அத்தனை ஆய்ந்துகொள் வார்க்கே.	6
இளைக்கின்ற வாறறிந் தின்னுயிர் வைத்த கிளைக்கொன்றும் ஈசனைக் கேடில் புகழோன் அளைக்கொன்ற நாகம்அஞ் சாடல் ஒடுக்கின் துளைக்கொண்ட தவ்வழி தூங்கும் படைத்தே.	7
பாய்ந்தன பூதங்கள் ஐந்தும் படரொளி சார்ந்திடு ஞானத் தறியினிற் பூட்டிட்டு வாய்ந்துகொள் ஆனந்த மென்னும் அருள்செய்யில் வேய்ந்துகொள் மேலை விதியது தானே.	8
நடக்கின்ற நந்தியை நாடொறு முன்னிப் படர்க்கின்ற சிந்தையைப் பைய ஒடுக்கிக் குறிக்கொண்ட சிந்தை குறிவழி நோக்கில் வடக்கொடு தெற்கும் மனக்கோயி லாமே.	9
சென்றன நாழிகை நாள்கள் சிலபல நின்றது நீள்பொருள் நீர்மேல் எழுத்தொத்து வென்று புலன்கள் விரைந்து விடுமின்கள் குன்று விழஅதில் தாங்கலும் ஆமே.	10
Go to top
போற்றிசைத் துப்புனி தன்திரு மேனியைப் போற்றிசெய் மீட்டுப் புலன்ஐந்தும் புத்தியால் நாற்றிசைக் கும்பின்னை யாருக்கும் நாதனை ஊற்றுகை உள்ளத் தொருங்கலு மாமே.	11
தரிக்கின்ற நெஞ்சம் சகளத்தி னுள்ளே அரிக்கின்ற ஐவரை யாரும் உணரார் சிரிக்கின்ற வாறு சிலபல பேசில் வரிக்கின்ற மைசூழ் வரையது வாமே.	12
கைவிட லாவதொன் றில்லை கருத்தினுள் எய்தி யவனை இசையினால் ஏத்துமின் ஐவ ருடைய அவாவினில் தோன்றிய பொய்வ ருடைய புலன்களும் ஐந்தே. 34,	13

Thevaaram Link  - Shaivam Link
Other song(s) from this location:
This page was last modified on Sun, 09 Mar 2025 21:48:18 +0000
          send corrections and suggestions to admin-at-sivaya.org

thirumurai song lang tamil pathigam no 10.733