This page in Tamil   Hindi/Sanskrit   Telugu   Malayalam   Bengali   Kannada   English   ITRANS    Marati  Gujarathi   Oriya   Singala   Tibetian   Thai   Japanese   Urdu   Cyrillic/Russian   Hebrew   Korean  
Easy version Classic version

7.015   சுந்தரமூர்த்தி சுவாமிகள்   திருப்பாட்டு திருநாட்டியத்தான்குடி - தக்கராகம் தீரசங்கராபரணம் ஆராபி ராகத்தில் திருமுறை அருள்தரு மலர்மங்கையம்மை உடனுறை அருள்மிகு கரிநாதேசுவரர் திருவடிகள் போற்றி சுந்தரர் திருவாரூரில் இனிதுறையும் நாட்களில் சோழ மன்னனுடைய சேனைத்தலைவரும் திருக்கோயில் திருவமுதுக்கு வேண்டும் செந்நெல்லைச் சேகரித்தளிக்கும் திருத்தொண்டரும் வேளாளருமாகிய கோட்புலி நாயனார் தம் ஊராகிய திருநாட்டியத் தான்குடிக்கு எழுந்தருளுமாறு சுந்தரரை வேண்டிக்கொண்டார். அவ் வேண்டுகோட்கிசைந்த சுந்தரர் திருநாட்டியத்தான்குடிக்கு எழுந்தருளினார். கோட்புலியாரும் வரவேற்றுத்தம் திருமாளிகைக்கு அழைத்துச்சென்று திருவமுது செய்வித்தார். தம்மக்களாகிய சிங்கடி, வனப்பகை யென்னும் பெண்கள் இருவரையும அழைத்து வணங்கச்செய்து, தம்பிரான் தோழராகிய தாங்கள் என் பெண்கள் இருவரையும் அடிமையாக ஏற்றருள வேண்டும் என வேண்டிக்கொண்டார். அவர்தம் அன்பின் திறமறிந்த சுந்தரர் இவர்கள் என் குழந்தைகள் என்று சொல்லி அன்போடு மடிமீதிருத்தி உச்சி மோந்து அவர்கள் வேண்டுவன அளித்து மகிழ்ந்தார். இங்ஙனம் கோட்புலியாரின் மகளிரைத் தம் மகள்களாக ஏற்றருளிய சுந்தரர், திருநாட்டியத்தான்குடிக் கோயிலையடைந்து பூணாண் ஆவதோர் என்று தொடங்கித் திருப்பதிகம் பாடி வணங்கினார்.

https://www.youtube.com/watch?v=14CaylRE330  https://www.youtube.com/watch?v=NdPYONZNHaI   Add audio link

பூணாண் ஆவதொ ரரவங்கண் டஞ்சேன் புறங்காட் டாடல்கண் டிகழேன் பேணா யாகிலும் பெருமையை உணர்வேன் பிறவே னாகிலும் மறவேன் காணா யாகிலுங் காண்பன்என் மனத்தால் கருதா யாகிலுங் கருதி நானேல் உன்னடி பாடுத லொழியேன் நாட்டியத் தான்குடி நம்பீ.	1
கச்சேர் பாம்பொன்று கட்டிநின் றிடுகாட் டெல்லியி லாடலைக் கவர்வன் துச்சேன் என்மனம் புகுந்திருக் கின்றமை சொல்லாய் திப்பிய மூர்த்தீ வைச்சே இடர்களைக் களைந்திட வல்ல மணியே மாணிக்க வண்ணா நச்சேன் ஒருவரை நான்உனை யல்லால் நாட்டியத் தான்குடி நம்பீ.	2
அஞ்சா தேஉனக் காட்செய வல்லேன் யாதினுக் காசைப் படுகேன் பஞ்சேர் மெல்லடி மாமலை மங்கை பங்கா எம்பர மேட்டீ மஞ்சேர் வெண்மதி செஞ்சடை வைத்த மணியே மாணிக்க வண்ணா நஞ்சேர் கண்டா வெண்டலை யேந்தீ நாட்டியத் தான்குடி நம்பீ.	3
கல்லே னல்லேன் நின்புகழ் அடிமை கல்லா தேபல கற்றேன் நில்லே னல்லேன் நின்வழி நின்றார் தம்முடை நீதியை நினைய வல்லே னல்லேன் பொன்னடி பரவ மாட்டேன் மறுமையை நினைய நல்லே னல்லேன் நானுனக் கல்லால் நாட்டியத் தான்குடி நம்பீ.	4
மட்டார் பூங்குழல் மலைமகள் கணவனைக் கருதா தார்தமைக் கருதேன் ஒட்டா யாகிலும் ஒட்டுவன் அடியேன் உன்னடி அடைந்தவர்க் கடிமைப் பட்டே னாகிலும் பாடுதல் ஒழியேன் பாடியும் நாடியும் அறிய நட்டேன் ஆதலால் நான்மறக் கில்லேன் நாட்டியத் தான்குடி நம்பீ.	5
Go to top
படப்பாற் றன்மையில் நான்பட்ட தெல்லாம் படுத்தாய் என்றல்லல் பறையேன் குடப்பாச் சில்லுறை கோக்குளிர் வானே கோனே கூற்றுதைத் தானே மடப்பாற் றயிரொடு நெய்மகிழ்ந் தாடு மறையோ தீமங்கை பங்கா நடப்பா யாகிலும் நடப்பனுன் னடிக்கே நாட்டியத் தான்குடி நம்பீ.	6
ஐவாய் அரவினை மதியுடன் வைத்த அழகா அமரர்கள் தலைவா எய்வான் வைத்ததொர் இலக்கினை அணைதர நினைந்தேன் உள்ளம்உள் ளளவும் உய்வான் எண்ணிவந் துன்னடி யடைந்தேன் உகவா யாகிலும் உகப்பன் நைவா னன்றுனக் காட்பட்ட தடியேன் நாட்டியத் தான்குடி நம்பீ.	7
கலியேன் மானுட வாழ்க்கைஒன் றாகக் கருதிடிற் கண்கள்நீர் மல்கும் பலிதேர்ந் துண்பதொர் பண்புகண் டிகழேன் பசுவே ஏறினும் பழியேன் வலியே யாகிலும் வணங்குதல் ஒழியேன் மாட்டேன் மறுமையை நினைய நலியேன் ஒருவரை நான்உனை யல்லால் நாட்டியத் தான்குடி நம்பீ.	8
குண்டா டிச்சமண் சாக்கியப் பேய்கள் கொண்டா ராகிலுங் கொள்ளக் கண்டா லுங்கரு தேன்எரு தேறுங் கண்ணா நின்னல தறியேன் தொண்டா டித்தொழு வார்தொழக் கண்டு தொழுதேன் என்வினை போக நண்டா டும்வயல் தண்டலை வேலி நாட்டியத் தான்குடி நம்பீ.	9
கூடா மன்னரைக் கூட்டத்து வென்ற கொடிறன் கோட்புலி சென்னி நாடார் தொல்புகழ் நாட்டியத் தான்குடி நம்பியை நாளும் மறவாச் சேடார் பூங்குழற் சிங்கடி யப்பன் திருவா ரூரன் உரைத்த பாடீ ராகிலும் பாடுமின் தொண்டீர் பாடநும் பாவம்பற் றறுமே.	10
Go to top

Thevaaram Link  - Shaivam Link
Other song(s) from this location: திருநாட்டியத்தான்குடி

7.015   சுந்தரமூர்த்தி சுவாமிகள்   திருப்பாட்டு   பூண் நாண் ஆவது ஓர் Tune - தக்கராகம்   (திருநாட்டியத்தான்குடி கரிநாதேசுவரர் மலர்மங்கையம்மை)

This page was last modified on Sun, 09 Mar 2025 21:48:18 +0000
          send corrections and suggestions to admin-at-sivaya.org

thirumurai song paadal paadal orig pathigam no 7.015